თქვენი ვალდებულებაა:
კეთილსინდისიერად შეასრულოთ საგადასახადო ან/და საბაჟო კანონმდებლობით გათვალისწინებული ვალდებულება; ეკონომიკური საქმიანობის დაწყებამდე დარეგისტრირდეთ გადასახადის გადამხდელად; დადგენილ ვადებში გადაიხადოთ გადასახადები კანონით გათვალისწინებული ოდენობითა და წესით; საგადასახადო ან/და საბაჟო ვალდებულების განსაზღვრის მიზნით განახორციელოთ დეკლარირება, აწარმოოთ აღრიცხვა-ანგარიშგება დადგენილი ფორმითა და წესით;კანონმდებლობით დადგენილი წესითა და პირობებით, წარმოადგინოთ ყველა ინფორმაცია, დოკუმენტი, რომელიც საჭიროა შემოსავლების სამსახურში მომსახურების მისაღებად, საგადასახადო ან/და საბაჟო ვალდებულების შესასრულებლად; შეინახოთ საგადასახადო ან/და საბაჟო ადმინისტრირებისთვის საჭირო დოკუმენტაცია კანონით დადგენილი წესითა და ვადით; მოთხოვნილი სერვისის მისაღებად, ვადაში გადაიხადოთ მომსახურების საფასური და საჭიროების შემთხვევაში წარმოადგინოთ მომსახურების საფასურის გადახდის დამადასტურებელი დოკუმენტი, გარდა იმ შემთხვევისა, როცა ასეთი მომსახურება გაიწევა უფასოდ; შეასრულოთ შემოსავლების სამსახურის, შემოსავლების სამსახურის უფლებამოსილი პირის კანონიერი მოთხოვნები საქართველოს საგადასახადო ან/და საბაჟო კანონმდებლობით გამოვლენილი დარღვევების აღმოფხვრასთან დაკავშირებით; ხელი შეუწყოთ შემოსავლების სამსახურის უფლებამოსილ პირს განახორციელოს კანონმდებლობით მინიჭებული, ვალდებულებები და მოვალეობები.
თქვენი უფლებაა:
პირადად ან წარმომადგენლის მეშვეობით წარმოადგინოთ თქვენი ინტერესები შემოსავლების სამსახურში; საგადასახადო ან/და საბაჟო კუთხით თქვენს უფლებებთან, ვალდებულებებთან, პროცედურებთან და სერვისებთან დაკავშირებული ინფორმაციის მიღების მიზნით მიმართოთ შემოსავლების სამსახურის უფლებამოსილ პირს; კანონმდებლობით დადგენილი წესით გაეცნოთ შემოსავლების სამსახურში თქვენ შესახებ არსებულ ინფორმაციას; საჭიროების შემთხვევაში და კანონმდებლობით დადგენილი წესით მოითხოვოთ თქვენზე არსებული ინფორმაციის დამატება, რედაქტირება, წაშლა, განახლება; უფლებამოსილებათა აღსრულების ან გადაწყვეტილების მიღების პროცესში შემოსავლების სამსახურის უფლებამოსილ პირს მოსთხოვოთ აღნიშნული უფლებამოსილების განხორციელების ან გადაწყვეტილების მიღების საფუძველი; კანონმდებლობით გარანტირებული საგადასახადო და საბაჟო შეღავათებით სარგებლობა; კანონმდებლობით დადგენილი წესის შესაბამისად დაიბრუნოთ ან/და მომავალ საგადასახადო/საბაჟო ვალდებულებათა ანგარიშში ჩაითვალოთ ზედმეტად გადახდილი გადასახადის ან/და სანქციის თანხა; კანონმდებლობით დადგენილი წესის შესაბამისად დაიბრუნოთ ან/და შემდგომ გადასახდელი მომსახურების საფასურის ვალდებულების დასაფარად გამოიყენოთ ზედმეტად გადახდილი მომსახურების საფასურის თანხა; საგადასახადო და საბაჟო კონტროლის განხორციელებისას მოითხოვოთ ინფორმაცია საფუძვლის შესახებ და საჭიროების შემთხვევაში წარადგინოთ განმარტება შემოსავლების სამსახურის შესაბამის ორგანოში; არ შეასრულოთ და გაასაჩივროთ კანონსაწინააღმდეგო აქტი ან მოთხოვნა; კანონით დადგენილი წესით მოითხოვოთ უკანონო გადაწყვეტილების ან ქმედების შედეგად მიყენებული ზიანის ანაზღაურება; მიიღოთ კომპეტენტური, დროული და თანმიმდევრული მომსახურება; გქონდეთ ინფორმაცია სერვისის მისაღებად საჭირო ვადებთან დაკავშირებით, მათ შორის იმ შემთხვევებში, თუ ვერ ხერხდება/ყოვნდება სერვისის მიწოდება, საკითხის სირთულიდან ან სხვა გარემოებიდან გამომდინარე; დადგენილი წესით გაასაჩივროთ შემოსავლების სამსახურის ქმედება ან გადაწყვეტილება.
ქარტიით შემოსავლების სამსახურის განაცხადია:
საქართველოს კანონმდებლობისა და ეთიკის ნორმების დაცვით საქმიანობა;სამართლიანი, ობიექტური და გამჭვირვალე ადმინისტრაციული წარმოება, საქართველოს საგადასახადო და საბაჟო კანონმდებლობის საფუძველზე; გადამხდელთა უფლებების და სახელმწიფოს ინტერესების დაცვა;გადამხდელთა უფლებებისა და კანონიერი ინტერესების დარღვევისათვის კანონმდებლობით გათვალისწინებული პასუხისმგებლობის აღება; საგადასახადო და საბაჟო ვალდებულებებისა და შემოსავლების სამსახურში არსებული სერვისების შესახებ სწორი ინფორმაციის გაცემის უზრუნველყოფა; ყველა ინსტრუქციისა თუ ინფორმაციის წერილობითი ან ელექტრონული ფორმით მიწოდების უზრუნველყოფა;თანასწორი დამოკიდებულება საგადასახადო ან/და საბაჟო ადმინისტრირებისა თუ სერვისის მიწოდების პროცესში; შემოსავლების სამსახურში არსებული ინფორმაციის კონფიდენციალურობის დაცვა კანონის შესაბამისად და დადგენილი წესით;ნებაყოფლობითი კანონშესაბამისობის ასამაღლებლად მაქსიმალურად ხელსაყრელი გარემოს შექმნა; მოწინავე ტექნოლოგიებისა და თანამედროვე მიდგომების გამოყენებით მომხმარებლებზე, მათ შორის შეზღუდული შესაძლებლობის მქონე პირების საჭიროებებზე, ორიენტირებული სერვისების დანერგვის უზრუნველყოფა;იმ პირთა მიმართ, რომლებიც თავს არიდებენ გადასახადების გადახდას, საგადასახადო/საბაჟო ვალდებულების დეკლარირებას ან/და შესრულებას მკაცრი ღონისძიებების გატარება; გადასახადის გადახდისგან თავის არიდების ან/და საგადასახადო/საბაჟო ვალდებულების დარღვევის თავიდან ასაცილებლად სხვადასხვა სახელმწიფოების საგადასახადო, საბაჟო ადმინისტრაციებთან და პარტნიორ საერთაშორისო ორგანიზაციებთან თანამშრომლობა.
გადამხდელთა ქარტია
გადამხდელთა ქარტია (შემდგომში - ქარტია) გადასახადის გადამხდელთა, საზღვრის მკვეთ პირთა და სსიპ შემოსავლების სამსახურის (შემდგომში შემოსავლების სამსახური) სერვისებით მოსარგებლე პირთა უფლებები და ვალდებულებებია.
ქარტიის მიზანია გააუმჯობესოს საგადასახადო/საბაჟო ურთიერთობები და შექმნას სწორი მოლოდინი საგადასახადო ან/და საბაჟო ვალდებულების შესრულებისას თუ სერვისების მიწოდებისას.